PRAVASIVARTHA

Bharat Mart UAE ദുബായ്: യുഎഇയില്‍ ഇന്ത്യന്‍ ഉത്പന്നങ്ങളുടെ വിപണന – സംഭരണ കേന്ദ്രമായി വിഭാവനം ചെയ്ത ഭാരത് മാര്‍ട്ട് അടുത്ത വര്‍ഷം മുതല്‍ പൊതുജനങ്ങള്‍ക്കായി തുറക്കും. ജബൽ അലി ഫ്രീ സോണിൽ (JAFZA) സ്ഥിതി ചെയ്യുന്ന ഭാരത് മാർട്ട് 2.7 ദശലക്ഷം ചതുരശ്ര അടിയിലധികം വിസ്തൃതിയുള്ള റീട്ടെയിൽ, ഷോറൂമുകൾ, വെയർഹൗസ് സ്ഥലം എന്നിവ ഉൾക്കൊള്ളുകയും ആഫ്രിക്ക, മിഡിൽ ഈസ്റ്റ്, യുറേഷ്യ എന്നിവിടങ്ങളിലേക്ക് ഇന്ത്യൻ ഉൽപ്പന്നങ്ങൾ എങ്ങനെ എത്തുന്നെന്ന് പുനർനിർവചിക്കാൻ സഹായിക്കുകയും ചെയ്യും. ഇരു രാജ്യങ്ങളും തമ്മിലുള്ള ബന്ധം ശക്തിപ്പെടുത്തുന്നതിനായി ദുബായ് കിരീടാവകാശി ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂം ഇന്ത്യയിലേക്കുള്ള തന്റെ ആദ്യ ഔദ്യോഗിക സന്ദർശനം അവസാനിപ്പിച്ച സാഹചര്യത്തിലാണ് പ്രഖ്യാപനം വന്നത്. യുഎഇയിലെ വാർത്തകളും ജോലി ഒഴിവുകളും തത്സമയം അറിയുവാൻ വാട്സ്ആപ്പ് ഗ്രൂപ്പിൽ അംഗമാകുക https://chat.whatsapp.com/KpmqRbHQBz88D2o8Opt0Oe ചൈനീസ് ഡ്രാഗൺ മാർട്ടുമായി താരതമ്യപ്പെടുത്തുമ്പോൾ, ദുബായിലെ ഒരു ബിസിനസ്-ടു-ബിസിനസ് (B2B), ബിസിനസ്-ടു-കൺസ്യൂമർ (B2C) വിപണിയായിരിക്കും ഭാരത് മാർട്ട്. ഇന്ത്യൻ ബിസിനസുകളും ആഗോള വിപണികളും തമ്മിലുള്ള വ്യാപാരം സുഗമമാക്കുന്നതിനായാണ് ഇത് രൂപകൽപ്പന ചെയ്‌തിരിക്കുന്നത്. നിർമ്മാണം ഇതിനകം ആരംഭിച്ചതായി ഡിപി വേൾഡിന്റെ ഗ്രൂപ്പ് ചെയർമാനും സിഇഒയുമായ സുൽത്താൻ അഹമ്മദ് ബിൻ സുലൈം പ്രഖ്യാപിച്ചു. ഷെയ്ഖ് ഹംദാന്റെയും ഇന്ത്യയുടെ വാണിജ്യ വ്യവസായ മന്ത്രി പിയൂഷ് ഗോയലിന്റെയും സാന്നിധ്യത്തിൽ കമ്പനി പദ്ധതിയുടെ വെർച്വൽ മോഡൽ അനാച്ഛാദനം ചെയ്തു. മാർട്ടിന്റെ ആദ്യ ഘട്ടത്തിൽ 13 ലക്ഷം ചതുരശ്ര അടി വ്യാപാര കേന്ദ്രമാണ് പൂർത്തിയാകുന്നത്. ഇന്ത്യയിലെ സൂക്ഷ്മ, ചെറുകിട, ഇടത്തരം വ്യവസായങ്ങൾക്ക് അവരുടെ ഉത്പന്നങ്ങളുടെ പ്രചാരണത്തിനും വിപണനത്തിനും ഭാരത് മാർട്ട് ഉപയോഗപ്പെടുത്താം. മൊത്തം 1500 ഷോറൂമുകൾക്ക് ഇവിടെ സൗകര്യമുണ്ട്. ഇതിനു പുറമെ 7 ലക്ഷം ചതുരശ്ര അടിയിൽ സംഭരണശാല, ചെറുകിട വ്യവസായ യൂണിറ്റിനുള്ള സ്ഥലം, ഓഫിസിനുള്ള സ്ഥലം, യോഗങ്ങൾ ചേരാനുള്ള സൗകര്യം എന്നിവയുമുണ്ട്. വനിതകൾ നേതൃത്വം നൽകുന്ന വ്യവസായ സംരംഭങ്ങൾക്കു മാത്രമായി പ്രത്യേക സൗകര്യങ്ങളും ഒരുക്കിയിട്ടുണ്ട്. ജബൽ അലി തുറമുഖത്ത് നിന്ന് ലോകത്തിലെ 150 തുറമുഖങ്ങളിലേക്ക് നേരിട്ട് ചരക്ക് എത്തിക്കാനുള്ള സൗകര്യമുണ്ട്. ഇതിനു പുറമെ വ്യോമ പാതയിലൂടെ 300 ലോക നഗരങ്ങളുമായും ബന്ധപ്പെടാം.