യുഎഇയുടെ ട്രാവൽ ആൻഡ് ടൂറിസം മേഖലയിൽ ഈ വർഷം 26,400 പുതിയ തൊഴിലവസരങ്ങൾ സൃഷ്ടിക്കപ്പെടുമെന്ന് വേൾഡ് ട്രാവൽ ആൻഡ് ടൂറിസം കൗൺസിൽ (WTTC) റിപ്പോർട്ട്. വിനോദസഞ്ചാര മേഖലയിലെ അഭൂതപൂർവമായ വളർച്ചയും പുതിയ ഹോട്ടലുകളുടെ കടന്നുവരവുമാണ് ഈ തൊഴിലവസരങ്ങൾക്ക് പ്രധാന കാരണം. കഴിഞ്ഞ വർഷം ട്രാവൽ ആൻഡ് ടൂറിസം രംഗത്ത് 8.9 ലക്ഷം പേരാണ് ജോലി ചെയ്തിരുന്നത്. ഇത് ഈ വർഷം അവസാനത്തോടെ 9.2 ലക്ഷമായി ഉയരുമെന്നാണ് പ്രതീക്ഷിക്കുന്നത്. രാജ്യത്ത് എട്ട് തൊഴിലവസരങ്ങളിൽ ഒരെണ്ണം ട്രാവൽ ആൻഡ് ടൂറിസം മേഖലയിൽ നിന്നുള്ളതാണ് എന്നതും ഈ രംഗത്തെ കുതിപ്പ് വ്യക്തമാക്കുന്നു. മിഡിൽ ഈസ്റ്റ് രാജ്യങ്ങളിലെ ഈ മേഖലയിലെ മൊത്തം തൊഴിൽ തസ്തികകളിൽ 12.3 ശതമാനവും യുഎഇയിലാണ്. നിലവിൽ മിഡിൽ ഈസ്റ്റിൽ ഏകദേശം 73 ലക്ഷം പേരാണ് ഈ രംഗത്ത് ജോലി ചെയ്യുന്നത്. യുഎഇയിലെ വാർത്തകളും ജോലി ഒഴിവുകളും തത്സമയം അറിയുവാൻ വാട്സ്ആപ്പ് ഗ്രൂപ്പിൽ അംഗമാകുക https://chat.whatsapp.com/E0Zj0gmloiGFnDLCXxx6Ek  ഏതാനും വർഷങ്ങൾക്കകം യുഎഇയിലെ ട്രാവൽ ആൻഡ് ടൂറിസം തസ്തികകളുടെ എണ്ണം 10 ലക്ഷം കടക്കുമെന്നും WTTC റിപ്പോർട്ടിൽ പറയുന്നു.

ടൂറിസം മേഖലയിൽ നിന്നുള്ള വരുമാനം ദേശീയ സമ്പദ്‌വ്യവസ്ഥയിലേക്ക് 26,750 കോടി ദിർഹം സംഭാവന ചെയ്യുമെന്നും കൗൺസിൽ വിലയിരുത്തുന്നു. ഇത് രാജ്യത്തിന്റെ മൊത്തം ആഭ്യന്തര ഉത്പാദനത്തിന്റെ (GDP) 13 ശതമാനത്തോളം വരും.

ഹോട്ടൽ മേഖലയിലെ റെക്കോർഡ് വളർച്ച

• 2024-ൽ രാജ്യത്തെ ഹോട്ടലുകളുടെ വരുമാനം 4,500 കോടി ദിർഹമായി ഉയർന്നു, ഇത് 2023-നെ അപേക്ഷിച്ച് 3 ശതമാനം വളർച്ചയാണ്.

• ഹോട്ടലുകളിലെ 78 ശതമാനം മുറികളും വിനോദസഞ്ചാരികളാൽ നിറഞ്ഞു, ഇത് ലോകത്തിലെ തന്നെ ഏറ്റവും ഉയർന്ന നിരക്കാണ്.

• കഴിഞ്ഞ വർഷാവസാനത്തെ കണക്കനുസരിച്ച് രാജ്യത്ത് 1251 മികച്ച ഹോട്ടലുകളാണുള്ളത്, 2,16,966 മുറികളാണുള്ളത്. മുൻവർഷത്തേക്കാൾ 3 ശതമാനം വർധനവാണിത്.

• കഴിഞ്ഞ വർഷം ഹോട്ടലുകളിലെത്തിയ സന്ദർശകരുടെ എണ്ണം 3.8 കോടിയാണ്, ഇത് മുൻവർഷത്തേക്കാൾ 9.5 ശതമാനം കൂടുതലാണ്.

ഈ കണക്കുകളുടെയെല്ലാം അടിസ്ഥാനത്തിലാണ് ട്രാവൽ ആൻഡ് ടൂറിസം രംഗത്ത് കൂടുതൽ തൊഴിലവസരങ്ങൾ ഉണ്ടാകുമെന്ന് WTTC പ്രവചിക്കുന്നത്.