Prophet’s Birthday ദുബായ്: യുഎഇയിൽ അടുത്ത വരാനിരിക്കുന്ന പൊതുഅവധി നബിദിനം. യുഎഇയിലെ പൊതുമേഖലയ്ക്കും സ്വകാര്യ മേഖലയ്ക്കും നബിദിനത്തിന് ഒരു ദിവസത്തെ അവധി ലഭിക്കും. ഇസ്ലാമിക കലണ്ടർ പ്രകാരം റബിഉൽ അവ്വൽ 12-നാണ് ഈ ദിനം വരിക.

2025-ൽ റബിഉൽ അവ്വൽ മാസം ഓഗസ്റ്റ് 24 ന് ആരംഭിച്ച് സെപ്റ്റംബർ 22-ന് അവസാനിക്കുമെന്നാണ് പ്രതീക്ഷിക്കുന്നത്. റബിഉൽ അവ്വൽ ഓഗസ്റ്റ് 24-ന് തുടങ്ങിയാൽ സെപ്റ്റംബർ 4 ന് ആയിരിക്കും നബിദിനം. ഓഗസ്റ്റ് 25 നാണ് ആരംഭിക്കുന്നതെങ്കിൽ നബിദിനം സെപ്റ്റംബർ 5 ന് ആയിരിക്കും. നബിദിനം സെപ്തംബർ അഞ്ചിനാണെങ്കിൽ വാരാന്ത്യങ്ങളായ ശനി, ഞായർ ദിവസങ്ങൾ ഉൾപ്പെടെ യുഎഇ നിവാസികൾക്ക് മൂന്ന് ദിവസത്തെ അവധി ലഭിക്കും. ചാന്ദ്ര ദർശനത്തെ അടിസ്ഥാനമാക്കിയുള്ളതാണ് ഇസ്ലാമിക കലണ്ടർ. 2025-ലെ തീരുമാനമനുസരിച്ച് പെരുന്നാൾ അവധികളൊഴികെ മറ്റ് പൊതു അവധികൾ വാരാന്ത്യത്തിൽ വന്നാൽ ആഴ്ചയുടെ തുടക്കത്തിലേക്കോ അവസാനത്തിലേക്കോ മാറ്റാൻ സാധ്യതയുണ്ട്. യുഎഇ മന്ത്രിസഭാ തീരുമാനത്തിലൂടെ മാത്രമേ ഇത് സാധ്യമാകൂ. ഓരോ എമിറേറ്റിലെയും പ്രാദേശിക സർക്കാരുകൾക്ക് ആവശ്യാനുസരണം അധിക അവധികൾ പ്രഖ്യാപിക്കാനുള്ള അധികാരവുമുണ്ട്.